नामदेवाची पायरी

विठू रंगात अवघ्या 

चंद्रभागा माझी भिजे 

कण कण वाळवंटी 

वारकरी होत सजे 

अभंगात सावळ्याच्या 

नाचे सारा भीमातीर 

सांडे अमृताचा घट 

माथी चंदन अबीर 

नाद टाळ मृदंगाचा 

संगे नामाचा गजर 

किती युगांचा प्रवास 

करे माऊली सुकर 

अभिषेक आसवांचा 

पायरीशी एक एक 

एका क्षणाचे दर्शन 

लाख जन्मांचे सार्थक 

तुला भेटण्या घालतो 

पार संसार पालथा 

कुठे शोधु मी कळस 

मृगजळाशी पायथा 

नामदेवाची पायरी 

ओलांडुन मन जाय 

वाट पाहते तिथेच 

लेकराची विठू माय