उजळू दे

उजळू दे हळुवार स्मृतींना

सुगंध- ज्योती दिव्या दिव्यातुन

ओल्या हळव्या आठवणींचा

फुटु दे पान्हा मनामनातुन

उजळू दे तिमिराच्या गगनी

धगधगणारी सूर्य चेतना

लक्ष लक्ष मार्तंड तारका

प्रकाशण्याची पूर्त कामना

उजळू दे नात्यांच्या ज्योती

हृदयातील अंधाऱ्या काठी

जिवंत सारे आज किनारे

मैत्र प्रवाही करण्यासाठी

उजळू दे अज्ञानी कुंभ

अमृत घेऊन विज्ञानाचे

अवकाशाच्या पटलावरती

दीपक ज्ञानी नक्षत्रांचे

उजळू दे शस्त्रांच्या अंगी

लखलखणारी तेज-शलाका

नाश होउदे रिपू रिपूचा 

विजयाची चढवून पताका

उजळू दे सौख्याचा दीपक

स्वागत करण्या आनंदाचे

मंतरलेल्या ऐन दिवाळी

उज्ज्वल नाते सौभाग्याचे