आराध्य तू

Happy Women's Day... 

आराध्य तू

जन्म देणारा जिवाला 

सर्जनाचा गर्भ तू

बाग फुलवी ते सुगंधी 

मृण्मयी वात्सल्य तू

जग तुझ्यावाचून उरती 

क्षुद्र निव्वळ श्वास काही

तेज देणारी तयांना 

शक्ति तू सौदर्य तू.

मर्त्य आणिक अमृताला

जोडणारा तू दुवा

कैकदा एकाच जन्मी

जन्म तू घेशी नवा

संकटांचे भस्म फासून 

रक्त भरशी मळवटी 

भैरवी माता जगाची

काल तू, मार्तंड तू

ना तुझ्या वाचून काही

जन्मले पृथ्वीवरी

देवही लोटांगणे घाली

तुला मन्वंतरी

देवळाचे देवपण 

ठायी तुझ्या गंगेप्रमाणे

अमृताचा ओघ तैसे

तेज तू, सामर्थ्य तू

भावनांची, लाघवांची

जोडीशी नाती किती

कल्पवृक्षांचीच रूपे

देवता आकारिती

कर्मयोग्याचे जणू तू

घेतले व्रत वैष्णवी,

लाभले अम्हास ऐसे

ओज तू, वरदान तू

वंचितांना दे अखंडित 

धार तू वरदायिनी

हात मायेचा तुझा दे

माय जीवन वाहिनी

एक देही, एकतारी

धारिसी रूपे किती 

सकळ जगती भावनांचे

मैत्र तू, आराध्य तू.

आदित्य