देव अताशा बोलत नाही

गाभाऱ्यातिल देव अताशा बोलत नाही
देव तिथे एकटा तयाला संगत नाही

मंत्र-यज्ञ चालती राऊळी वैदिक मोठे
परी आरतीसम मंत्रांना रंगत नाही

गर्दी जमते अलोट भाविक अन भक्तांची
रांग इथे इच्छा, नवसांची संपत नाही

ओरडून सांगा हो कोणीतरी एकदा
'हे देऊळ आहे, व्यापाऱ्यांची पंगत नाही'

नोटांनी ठरतो भक्तीचा दर, भाव मंदिरी
हृदयातील देवाला तिकडे किंमत नाही

देव कधीचा निघून गेला आहे आता
दगड होउन बसण्याची त्याची हिंमत नाही

देऊळ कसले दुकान हे श्रद्धेचे केवळ
चालू राहिल दगड जोवरी भंगत नाही

आदित्य