फक्त एवढे जाता जाता

फक्त एवढे जाता जाता करून जा तू
आठवणींतून माझ्यापाशी उरून जा तू

बाग कोवळी सुकून गेली आहे माझी
गंध फुलांच्या श्वासांमध्ये भरून जा तू

काय म्हणावे अपुल्यामधील नात्याला या
एकदा तरी उत्तर याचे लिहून जा तू

हसता हसता निरोप घेताना शेवटचा
तुझे तेवढे डोळे ओले पुसून जा तू

जाशिलही ओलांडुन दर्या क्षितिजापाशी
किनाऱ्यासही थोडे ओले करून जा तू

साठवलेला पाऊस आता आटत आहे
शेवटचे डोळ्यांतून माझ्या गळून जा तू

आदित्य